葡萄牙讓球和又尼料

猪拉多纳

費帥最叻煲魚生粥

歐國盃外圍賽繼續烽煙四起，有萬人迷C朗壓陣嘅葡萄牙，喺今晚I組外圍賽作客硬撼阿美尼亞。由於C朗喺葡萄牙目標太大，往往成為眾矢之的唔及喺皇馬咁搶鏡，況且主帥費蘭度山度士最鍾意煲魚生粥僅僅熟，預計葡軍頂盡小勝，讓球主客和讓一球，不妨博好分頭嘅讓球和。

（有線64及203台周日凌晨零時直播）

點解C朗喺皇馬同葡萄牙嘅反差咁大？一來中場組織力麻麻，二來葡萄牙總係冇一名入球效率高嘅前鋒，雖然皇馬中鋒賓施馬唔算係高產射手，但佢擅於走位同造波，經常無私地為C朗鋪橋搭路，有時葡軍索性搵呢位萬人迷打中鋒，令佢陷入對方後衞嘅重重包圍，咁樣點會有好表現呢？就算C朗肯犧牲做更多配合，可惜葡軍隊友質素實在差太遠，往往效果差強人意。

至於中途接手葡萄牙嘅主帥費蘭度山度士，以往執教希臘都係打開穩守突擊，而且葡軍亦欠缺主攻本錢，對住強隊或者演出更佳，相反面對刻意死守嘅弱旅，總係老鼠拉龜冇碇埋手，惟有玩番最擅長嘅「1比0」悶蛋足球，先求穩守唔理好醜。睇番佢上任後四場勝仗均贏一粒，絕非巧合。
阿美尼亞上次對戰僅敗

阿美尼亞雖排緊呢組包尾，但陣中有効力多蒙特嘅「阿國施丹」米希達利恩孭飛，不容小覷，睇番雙方上年交手，葡萄牙都係幾經辛苦之下，靠C朗下半場一箭定江山小勝1比0，相信今仗作客會更加難踢，斯維認為葡萄牙頂盡贏一粒，客W得1.39倍又冇乜肉食，既然讓球主客和葡軍讓一球，不妨吼有3.25倍嘅讓球和。