塞爾維亞頂到丹麥

猪拉多纳

另一場I組比賽，以七分排緊第二位嘅丹麥會喺主場面對塞爾維亞，雖然塞軍4戰得1分，但其實佢哋實力未至於渣成咁，整體陣容人腳都唔差，防守有尼曼查馬迪、伊雲洛域等鐵血戰士，所以科娜今場一於撐塞爾維亞踢爭氣波，作客唔使輸，捧讓球客勝！

（有線62及202台周日凌晨2時45分直播）

塞爾維亞喺上年十月主場鬥阿爾巴尼亞因為有球迷搞事，雖然被判贏3比0，但就1分都攞唔到，跟住又連輸畀丹麥同葡萄牙，搞到依家喺榜內排緊尾二。塞軍今場作客丹麥，真係唔可以再衰，睇番球隊人腳，其實比丹麥更好，前面有拿沙馬高域同拿積兩大進攻天才，上個禮拜熱身賽對阿塞拜疆，佢兩個都有波入，狀態唔錯，後面就有尼曼查馬迪、伊雲洛域、高拉洛夫三大英超鐵衞頂住，踢法勁硬淨。
賓特拿神經刀難靠

丹麥嘅進攻主要靠晒熱刺中場基斯甸艾歷臣一個，前線嘅賓特拿又神經質，靠佢入波認真信唔過，所以塞爾維亞只要守死基斯甸艾歷臣，截斷其傳送，今場要保住不敗並非難事，甚至反客為主都有可能，所以1.65倍嘅讓球客勝真係捧得過！