巴西超班盡數

猪拉多纳

女球王瑪達一個玩晒！

女子世界盃E組賽事，巴西女足於加拿大蒙特利爾鬥西班牙女足，呢個戲碼如果放喺男子足球會係一場五五波，不過西班牙喺女足世界只屬歐洲二流隊伍，面對擁有五屆世界足球小姐瑪達壓陣嘅巴西難有勝算，捧讓球主勝。

（中央5台周日凌晨4時直播）

玩女世盃有一條法則必須謹記，就係唔可以用男足把尺去度女足實力。西班牙男子隊早幾年喺國際賽點威水相信唔使波童多講，兩大班霸皇馬、巴塞更加連奪兩屆歐聯冠軍，但講到女子隊方面，今次只係西班牙首次打入世盃決賽周，而且喺球會級比賽例如女子歐聯，西班牙球會莫講話攞冠軍，就連一次決賽都冇入過，整體水平喺歐洲嚟講根本唔算頂級，嚟到國際大賽更加惡唔出樣。
西班牙女足唔入流

西班牙首仗打和哥斯達黎加確係冷門戰果，但查實哥斯達黎加係應屆美洲金盃亞軍，決賽僅僅不敵女足強者美國，西班牙搶到一分似乎先係「爆冷成功」！

巴西女足雖然冇攞過世界盃冠軍，但同男子隊一樣從未缺席世盃決賽周，而且佢哋擁有五屆世界足球小姐（國際足協金球獎）瑪達坐陣，以其級數足以「一個打十個」，其餘主力姬絲蒂安妮、羅姍娜等代表國家隊次數亦逾一百次，計大賽經驗贏足成條街。巴西首輪輕取南韓二比○，狀態仲有提升空間，經過熱身後相信表現會更上一層樓，有力贏兩粒開出讓球主勝。