英格蘭客W有着洛

猪拉多纳

朗尼爭做「三獅士哥王」

今晚歐國盃外圍賽重頭戲，E組英格蘭作客火併斯洛文尼亞。英格蘭喺呢組一枝獨秀超晒班，隊長朗尼更目標鮮明，為追趕名宿卜比查爾頓做「三獅士哥王」，今仗實加多兩錢肉緊入波，守強攻弱嘅斯洛文尼亞好難頂到尾，簡簡單單捧英軍客W。（有線61及201台周一凌晨零時直播）

個個都話英格蘭領隊鶴臣老懵懂又守舊，不過佢勝在經驗豐富，特別係應付外圍賽呢類非一場過生死戰嘅賽事，總能穩打穩紮帶領球隊順利過關。睇番英格蘭上年世盃分組賽慘淡出局，3個月後即華麗轉身，於歐國外首仗輕取實力唔錯嘅瑞士，現時英軍喺E組5戰全勝，甩開斯洛文尼亞同瑞士6分排「冧巴溫」，有辦你睇。
朗尼差2球追平卜比Sir

雖然英格蘭上仗搵愛爾蘭「拍跳」表現不知所謂，但始終係一場無關痛癢賽事，班大帝hea踢擺明留力今仗喇。貴為「三獅兵團」隊長，「魔童」朗尼唔單止要身先士卒做好榜樣，佢亦有另一項使命，就係追趕英軍史上第一射手、卜比查爾頓多年未破嘅入球紀錄，朗尼依家累積47個入球，只係差卜比Sir兩粒，如果佢今仗入1球就拍住另一名宿連尼加，入夠兩粒更同卜比Sir平起平坐，加上史杜列治同韋碧克因傷落選，哈利卡尼要出戰U21歐國盃避戰，因此入球重任就落喺之前4場歐國外都有進帳嘅朗尼身上。
斯洛文尼亞往績輸蝕

本來斯洛文尼亞最叻係施「守」術，喺今屆5場外圍賽有3仗保清白之身，但所失4球中有3球係來自上次作客英格蘭，近3次碰頭英軍亦贏晒，證明畀對手恰住，加上斯軍識守唔識攻，前線仍倚重喺日職搵食嘅老將路華高域同隆比真歷，奇雲甘保爾轉投多蒙特後愈踢愈沉，旨意佢哋入波蛇都死。斯維相信英格蘭恃質可小勝對手，客W有1.68倍咪嫌少呀。