白俄引爆狂牛炸彈大解放

猪拉多纳

今晚歐國外C組西班牙作客白俄羅斯，理應係強弱懸殊，不過「狂牛」門神卡斯拿斯同中堅沙治奧拉莫斯正煩緊各自喺皇馬嘅前途隨時發波瘟，好彩中場法比加斯為上位必定搏甩髀，唔愁冇波入，客W太熱轉玩大盤好過。（有線61及201台周一凌晨2時45分直播）
聖卡斯把關隨時發波瘟

嚟緊7月轉會市場重開，有乜風吹草動都會影響一班球星嘅情緒，有傳皇馬即將簽入曼聯神龍迪基亞，忠臣卡斯拿斯快將被踢走，雖然「聖卡斯」唔愁冇出路，但未能留喺「銀河艦隊」掛靴絕對係遺憾，而佢皇馬隊友沙治奧拉莫斯近排亦好煩，皆因「銀河艦隊」已拒絕佢稅後1000萬歐元年薪嘅要求，「沙拉」話唔加人工就走。照計西班牙主帥迪保斯基嘅門將輪換制，今仗作客白俄輪到卡斯拿斯把關，但佢心不在焉，加上沙治奧拉莫斯情緒化易出錯，兩人隨時成為「狂牛」計時炸彈。

不過法比加斯近排回勇，日前熱身賽入波兼助攻幫球隊反勝哥斯達黎加，而西班牙喺「後沙維時代」，中場仍群龍無首，加上經驗豐富嘅恩尼斯達因傷退隊，造就法比仔榮升新核心好時機。以往法比仔畀沙維同恩尼斯達壓住做「下把」，如今有機會發圍擔正仲唔騷下哥利。現時西班牙喺C組落後斯洛伐克3分排第2，只領先第三烏克蘭3分，頭兩名直入決賽周資格未穩陣，今仗對白俄勢必火力全開爭勝，客W得1.2倍咁乏味，寧轉玩1.78倍入球大。