阿根廷半場W快靚正

猪拉多纳

今屆美洲國家盃大熱門阿根廷，明早於B組次輪硬撼上屆盟主烏拉圭，「潘帕斯雄鷹」首仗大好形勢下慘遭逼和，美斯仲畀對手狂踢搞到發晒忟憎，谷埋成肚火，遇上冇「咬人蘇」蘇亞雷斯攻力大減嘅烏拉圭，優勢明顯，應該係時候開齋攞晒3分，估計阿根廷一開波就會嚟料搶攻，力圖憑強大鋒力爭取早破悶局，繼而打沉烏拉圭士氣，有見及此，斯維建議揀分頭唔錯嘅半場主勝。

（now 681周三早上7時30分直播）
首仗失分谷住道氣

阿根廷坐擁美斯、阿古路、希古恩、迪馬利亞、泰維斯等猛將，陣容超級鼎盛，難怪今屆美洲盃開波前，領隊馬天奴話美斯咁弗，任何球隊都贏唔到佢哋，有信心係好事，但過分咗就變成自大，好似首仗對住巴拉圭，上半場領先兩粒，擺明超晒班，點知易邊後卻明顯有所鬆懈，前鋒又不斷浪費「餐士」，最終畀巴拉圭反客為主追成2比2，原本落咗袋嘅3分，都要嘔番2分出嚟，可謂咎由自取。

賽後馬天奴鬧爆手下喺大好形勢都未能保住勝果，佢仲話如果阿軍把握力好啲，完全可以大勝5比2，睇得出「潘帕斯雄鷹」谷埋成肚火好唔甘心。隊長美斯該仗更畀巴拉圭球員狂踢搞到躁晒，呢位王牌話領先嗰陣應該放慢節奏，盡量Keep住控球權，而唔係盲目同對手鬥攻，可見美斯已經從中吸取咗教訓，今仗唔會再重蹈覆轍。
卡雲尼孭唔起重飛

雖然烏拉圭首仗順利小勝牙買加1比0，但冇咗停賽無緣美洲盃嘅蘇亞雷斯，前線攻力大打折扣，中鋒卡雲尼級數係高，可惜呢位聖日耳門射手再次證明未能獨自擔大旗，冇「咬人蘇」傍住即刻冇料到。最弊係連一向穩健嘅防線，面對弱旅牙買加都表現甩甩漏漏，點頂住志切開齋嘅阿根廷先？

由於首仗落筆打三更，阿根廷必定求勝心切，預計初段會以獅子搏兔之勢撳住搶，斯維認為半場主勝非常值博。