委內瑞拉追打秘魯

猪拉多纳

新帥有料到「老虎」都唔驚

聽朝美洲盃C組上演上屆季軍戰翻版，秘魯對委內瑞拉，場波同時亦係兩位國家隊新丁教頭直接交鋒。委內瑞拉上屆以1:4慘敗喺秘魯手上，輸咗個季軍，撞啱今場對手有主力受傷，梗係想贏波報仇一雪前恥，平手盤一於捧1.92倍委內瑞拉。（now681台周五早上7:30直播）

雖然委內瑞拉係唯一一支未踢過世界盃決賽周嘅南美球隊，不過佢哋近年持續進步，上屆美洲盃飲恨秘魯僅得殿軍，但當屆球員唔少目前仍在陣中，呢鋪肯定仇人見面分外眼紅，今場實行搏老命都似。
易帥5戰4勝

上場封殺哥倫比亞

事實上，委軍陣中有唔少外流好手壓陣，包括辛尼特射手荷西朗頓、熱拿亞中場湯馬士連干、南特守將維斯卡朗度等人，當中荷西朗頓今季更攻入12球幫辛尼特贏得俄超冠軍，上仗亦一頭頂爆哥倫比亞，戰鬥力絕對冇想像中咁差。

雖然主帥辛維辛迪首次教國家隊，但呢位喺國內打滾超過10年嘅領隊聲望甚高，上年喺全國媒體同球迷聲援下，大熱登上國家隊主帥一職。佢亦不負厚望，球隊經過磨合後愈戰愈勇，近5戰贏出4場，上場封殺哥倫比亞一對箭頭「老虎」法卡奧、卡路士巴卡，更盡顯執教功力，今次對住鋒力更差嘅秘魯，至少封咗蝕本門先啦！
秘魯法芬 華加斯

有傷頂硬上

對手秘魯首仗鬥巴西先勝後敗，話對軍心冇打擊就勢係假。更麻煩嘅係，兩大主力前鋒法芬、守將祖安華加斯受傷缺席賽前操練。但由於呢場波關係重大，據講焗住帶傷上陣，仲點旨意佢哋幫到手。況且國家隊新丁領隊加雷卡2月先接手秘魯，根本冇太多時間了解班波，上任3戰亦只得1和2負，包括4月以0:1輸畀委內瑞拉，呢鋪佢哋仲要焗攻搶分，都係不宜沾手為妙。（美洲盃C組）