智利食住個細惡鬥玻利維亞

猪拉多纳

美洲盃已經踢咗成個禮拜，終於都嚟到分組賽最後一輪，聽朝就先踢兩場A組比賽，重頭戲當然係東道主智利大戰玻利維亞，智利主將維達爾涉嫌醉駕被捕，球隊唔受影響就假，另一王牌阿歷斯山齊士（A山）狀態唔弗，今場對住玻利維亞難取得甜頭，不妨捧細。

（now 681周六早上7時30分直播）
A山露疲態惡搵食

依家A組形勢，智利同玻利維亞同得4分，智利得失球差較佳排榜首，即係話智利今場只要不敗就可以出線，若然今場和波，咁排第3嘅墨西哥對住厄瓜多爾除咗一定要贏外，仲要睇同玻利維亞嘅得失球差，先知邊隊可以晉級。

智利上仗對墨西哥就係因為防守曳而攞唔到3分，今場必會進一步加強防守。維達爾依家係智利陣中嘅神射手，兩場入咗3球。不過，呢個衰仔包無啦啦喺呢個重要時刻涉嫌醉駕炒車被捕，勢必影響軍心。今場即使可以上陣，智利都唔使旨意靠佢入波，而另一個王牌A山經過一季英超激戰後疲態漸露，又畀對手嘜死，搞到兩場都開唔到齋，估計智利今仗唔會多波入。玻利維亞喺今屆表現令人充滿驚喜，有力頂住智利嘅進攻，一於捧細！
墨西哥唔W唔掂

至於早場墨西哥對厄瓜多爾，正如剛才所講，墨西哥唔W唔得，仲要盡可能入多啲波，佢哋上場對智利已經盡顯決心，成功逼和對手3比3，今場面對頹爆嘅厄瓜多爾，主W博得過！（now 681周六凌晨5時直播）