紅鑽派Ｗ開香檳

猪拉多纳

紅鑽登基在望！今日晏晝日職一哥浦和紅鑽作客神戶勝利船，前者依家放到甩晒轆，只要今仗贏波便可提前一輪於首階段聯賽封王，撞正主場腳軟嘅勝利船，唔Ｗ等幾時？客勝有買趁早。

（有線61及201台周六下午3時直播）

先講講首階段聯賽形勢，弗到漏油嘅紅鑽，唔單止係今季唯一未敗之師，創下日職史上最佳開咧成績（11勝4和），仲喺剩番兩輪下領先次席廣島三箭七分排榜首，咁咪即係奪得首階段冠軍？未住，細心睇一睇，原來落後九分嘅「四弟」大阪飛腳係打少一場，意味住飛腳仍有機會後來居上。查實紅鑽上季臨尾香失冠，正正就係畀飛腳發力反先，難得紅鑽依家形勢大好，況且只要擊敗勝利船，就算飛腳連埋今輪贏晒最後三場（包括補賽）都肯定追唔到，紅鑽為提早一輪封王兼擺脫陰霾，肯定搏甩髀。

紅鑽今季順風順水，實在有賴三大殺手興梠慎三、武滕雄樹同隆比真歷輪流發威，齋計聯賽佢哋已包辦咗十六個入波，加上中場梅崎司後上入楔屢有佳作，比起勁敵飛腳太過倚懶宇佐美貴史（9球）平衡得多。神戶勝利船乃今季日職一路「奇」兵，佢哋能夠平平穩穩位處中游，全靠作客係咁搶分，依家累積嘅十七分，有十四分係來自客場。
勝利船主場未威過

相反，勝利船喺自己地頭唔識踢波，今季僅得三分，單計主場成績排包尾，真係見到都唔開胃，憑乜嘢阻止到志切奪冠嘅紅鑽呢？紅鑽客Ｗ有1.76倍，一於博佢哋贏波封王。