飛腳搏拳力挽狂瀾

猪拉多纳

另一場日職賽事由大阪飛腳主場對仙台維加泰，排第四嘅飛腳數字上仍有機會攞到首階段聯賽冠軍，先決條件係贏晒餘下所有賽事，同時要榜首紅鑽輸晒，雖然睇落難度甚高，但飛腳上下唔會放棄呢個些微嘅機會，今仗主場出擊面對有幾位主力缺陣嘅維加泰相信唔會手軟，阿謙推介讓球主勝。

（有線64及203台周六下午3時直播）

飛腳自上月初作客輸畀紅鑽後，已連績八場賽事未輸過，但當中喺聯賽和咗三場，令球隊無法追近榜首嘅紅鑽，更由於少踢一場嘅關係，令球隊現時只係排第四。由於紅鑽同日贏波就可以提早封王，飛腳現時只能夠做好本分贏晒餘下所有賽事，同時寄望紅鑽輸晒，所以嚟緊每場賽事都會全力以赴。飛腳今仗雖有後衞內田達也及西野貴治未好番，但主力好似宇佐美貴史、遠藤保仁同今野泰幸嘅狀態都唔錯，主場出擊有力喺維加泰身上攞到入球。
維加泰殘陣瓜得

維加泰近三仗取得兩勝一和，上仗更大勝鳥棲砂岩五球，表現令人眼前一亮。不過，呢支東北球隊今季表現唔係太穩定，現時只排喺聯賽第七位，今仗更有威爾遜洛迪古斯、中場奧野博亮同後衞石川直樹缺陣，單靠前鋒金園英學同中場主將梁勇基未必能對飛腳構成威脅，阿謙睇好飛腳可以喺主場輕取對手，捧讓球主勝。