卡雲尼隱形 烏拉圭讓唔起

猪拉多纳

周六晚美洲國家盃B組煞科戰，排喺小組第3名嘅烏拉圭，如果要爭直接出線席位嘅話，今仗必須擊敗巴拉圭，可惜佢哋缺少咗科蘭同蘇亞雷斯兩部入球機器，由卡雲尼擔大旗嘅鋒線完全冇料到，今場讓平半制唔過，寧捧巴拉圭2.1倍下盤好過。（now681台周日凌晨3:00直播）

科蘭退役、蘇亞雷斯停賽，唔少人都話係卡雲尼證明自己身價嘅好時機，但佢始終唔爭氣，頭兩輪表現猶如「隱形人」，鋒力根本冇保證。雖然烏拉圭近4次鬥巴拉圭錄得2勝2和，合共攻入7球，睇落好似食住對手，但要留意其中6球係由科蘭同「哨牙蘇」所攻入，今場旨意冇料到嘅卡雲尼做救世主？似乎難啲囉！
巴拉圭3字頭射手對辦

咪睇巴拉圭陣中成堆老將，實情個個都老而彌堅，首輪硬撼勁旅阿根廷雖然半場落後兩球，但換邊後由希度華迪斯同巴里奧斯兩件「三字頭」射手各省1粒扳平，表現對辦過卡雲尼多多聲。巴拉圭下盤值博之餘，今場趁烏拉圭隊長兼中堅高甸要坐波監，隨時偷雞贏埋都仲得，進取嘅朋友不妨直敲3.8倍客W，話唔埋會有意外驚喜。