尼馬停4場廣告客戶被抽水

猪拉多纳

尼馬累街坊！巴西王牌尼馬上場鬥哥倫比亞將個波省落對手身上領紅被逐，尋日佢終於收到賽會罰單，一共要坐4場波監，換言之就算巴西殺入決賽亦再冇機會見到尼馬落場。除咗巴西，連搵咗尼馬拍廣告嘅客戶都畀佢跣鑊甘！

南美足協尋日喺官網宣布，重罰巴西隊長尼馬停賽4場，並罰款1萬美元（約7.8萬港元），至於同尼馬發生衝突嘅哥倫比亞前鋒卡路士巴卡亦要坐2場波監。據講巴西足總將會提出上訴，尼馬尋日就繼續同隊友一齊操練，未肯咁快投降。不過「新比利」呢鋪唔只連累國家隊，仲搞臭埋自己嘅商業形象。佢同巴西電池品牌Heliar Battery（圖）合作嘅新廣告尋日尷尬面世，搞到Heliar Battery畀唔少球迷抽水，話唔嬲就假啦。
馬斯真蘭奴雪中送炭

另邊廂，尼馬老竇尼馬達斯華又因為身陷囝囝轉會巴塞一案中，擔心一旦離開巴西好有可能被歐洲當局「請」佢去協助調查，結果唔敢親自探尼馬。好在尼馬仲有巴塞隊友馬斯真蘭奴雪中送炭：「我覺得應該要好好保護尼馬呢類球員，對手有時踢咗佢廿幾腳先攞黃牌，肯定影響佢嘅情緒。」呢位阿根廷中場仲提醒大家話尼馬只係23歲仔，暗示大家呢次應該多多包容喎。