二打六孭飛 森巴兵自「委」長城

猪拉多纳

後生仔始終都係後生仔，尼馬雖然以隊長身份帶領巴西衝擊美洲國家盃冠軍，但呢位森巴王牌喺上輪分組賽輸畀哥倫比亞後，竟然情緒失控怒省對手，最後硬食紅牌，行為似足個小學雞。大家都知「森巴軍團」食粥食飯不嬲靠晒尼馬，聽朝佢哋喺C組生死戰鬥委內瑞拉，只能靠班二打六數胡，贏波唔係咁易，撐委內瑞拉受讓一球嘅1.89倍下盤！（now681台周一清晨5:30直播）

隨住第2輪分組賽秘魯擊敗委內瑞拉、哥倫比亞砌低巴西，目前C組4隊同樣揸住3分，得失球差亦都一樣，爭出線形勢緊湊到爆，就算暫列榜首嘅「森巴軍團」都有機會出局，所以最終邊隊冇得留低，真係唔踢埋最後嗰輪都未知！
委內瑞拉近4次對賽輸1鋪

當然，如果巴西唔想喺美洲盃分組賽出局咁樣衰，今場只要擊敗委內瑞拉就一天都光晒。可惜嘅係，「森巴軍團」近年變成尼馬嘅一人球隊，首輪能夠反勝秘魯全靠佢1傳1射，上場鬥哥倫比亞，尼馬一冇料到就已經破門乏力。巴西今場波冇尼馬孭飛，鋒線選擇剩番質素有限嘅迪亞高泰達利同埋已經回晒塘嘅羅賓奴，嘩大佬，咁點靠得住呀！

委內瑞拉首輪鬥眾星雲集嘅哥倫比亞都未驚過，以穩守突擊砌低對手，次輪對住秘魯輸波，全因開賽唔夠半粒鐘就踢少個後衞阿武列比達，打亂戰術部署，但佢哋最終都只係僅輸一球，表現有晒交代。再講，委內瑞拉近年已經唔係以往任由巴西魚肉嘅魚腩，近4次碰頭仲拎到1勝2和1負成績添，其中兩戰喺中立場交手都唔使輸，今場受讓一球坐走望贏，唔係唔撐吓嘛！