千葉征福地撐客W

猪拉多纳

大分9戰不勝近況唔掂

水鬥水本來應該要主隊，問題係日乙包尾大幡大分三神唔單只傷兵多，仲要9連不勝，今日主場對住5戰未贏過嘅千葉市原，恐怕都冇乜本錢反彈，至叻仔頂龍和波，所以點都係博千葉作客小勝着數啲。
大分唔齊腳難翻身

大分今季嘅表現真係令人慘不忍睹，開咧咁耐贏得嗰兩場，最近9場仲未W過，家陣跌到落榜尾，再唔發力恐怕來季真係要响日丙見。不過，佢哋想翻身並唔容易，事關今季加盟嘅巴西中場菲臘比、前鋒永井龍同埋三平和司一齊打柴，最快要到下個月初至出得，佢哋焗住要向同市嘅JFL球隊大分偉士帕收番中場姬野宥彌、後衞佐藤昂洋頂住檔，但係呢兩件細路廿歲都未夠，好難幫到乜嘢手，大分依家只有寄望後藤優介、伊佐耕平呢兩個上兩場有波入嘅鋒將，能夠做到救世主啦。
千葉比斯尼克歸隊

千葉查實都唔係乜嘢好貨色，近5場波得3和2負，名氣最大嘅前鋒森本貴幸，直至上場對福岡黃蜂至攞到15場波以嚟嘅首個入球，總算叫做打破入球荒。但係大家要記住一點，今場波係响大分銀行Dome上演，呢個大分主場簡直係千葉嘅福地，佢哋咁多年嚟11次响呢個場打波，取得9勝2和不敗佳績，加埋斯洛文尼亞國腳比斯尼克踢完國際賽歸隊，增強咗千葉嘅攻擊力，的確有權開個1.92倍客W。