壽比南山泥出招

不死鸟

第一場4班1650米（泥地）。「壽比南山」（左圖）易主後轉投李廐發展，季內兩戰草地中距離俱後上得第四，今次雖然初度轉跑泥地賽事，但賽前試一課泥地大閘，直路穿插而上勝出，完全不怕食沙，走勢可用譽滿欄邊形容，今次同場對手實力未見突出，穩位望贏應可做到。「爆發力」上次季內初出嫌短1200米幾乎跑入冷位，老馬今季狀態明顯早來，今次回師勝途負輕磅，當屬前駒的心腹大患。「開心歡樂」上次牛刀小試已跑近，「川河飛駒」狀態有水準，換杜利萊都可作配。
第六場2班1600米（草地）。「開心多多」上季同程?住133磅與「首飾奇寶」鬥足一條直路贏馬，賽績無花無假，硬拚之後馬房亦借勢回氣，季內四戰一班賽事亦所負不遠，今次落班面對一批2班對手，回配贏馬拍檔巫斯義，有分頭更值一敲。「喜盛龍」季內三戰全上名，今次負磅下調如釋重負，有權介入戰團。「賞惑」如日方中，「鷹闖」闊場更佳都可加入作配。