日本老化捱細界

猪拉多纳

女子世界盃明早上演最後一場16強賽事，由衞冕嘅日本女足鬥歐洲代表荷蘭女足。日本今屆表現慢熱，三場分組賽贏波都係「煲魚生粥」僅熟贏一粒，面對踢法主守嘅荷蘭預計入波唔會多，細盤乃不二之選。（中央5台周三早上10時直播）

日本今屆沿用大部分上屆奪標功臣進行衞冕，其中宮間綾、大野忍、岩清水梓等主力唔過三十都廿到「忟」，上屆金球獎得主、卅六歲嘅澤穗希更屬「元老級」球員，間接令行軍速度大減，分組賽雖然三戰全勝，不過三場都係僅勝一球，可見本身體格已經輸蝕嘅日本，依家對住踢法體力化、或者身形較高大嘅對手一啲都冇着數，純粹贏在個人質素及默契，表現略欠霸氣。
荷蘭「守」勢強

荷蘭實力唔算強，今屆喺A組一勝一和一負，僅以第三名出線，但防守有紀律，除對中國力戰至補時階段失守，對新西蘭、加拿大加埋亦只係失一球，所以唔好預期佢哋會同對手鬥攻。以大細中位數2.5球計，兩隊今屆六場分組賽只有一場開大盤，嚟到淘汰賽相信大家會踢得更加保守，捧細盤啱數。