英意新紮射手大駁火

猪拉多纳

背水一戰 哈利仔睇你喇

在捷克舉行的U21歐洲國家盃，B組生死戰英格蘭U21對意大利U21，兩隊最多只能活一隊，若然和波，更可能「攬炒」一齊出局，大家都冇得縮，勢必擺大個頭搶攻。英軍名牌射手哈利卡尼經過兩場「熱身」後，係時候發威，一向慢熱嘅意大利亦開始上力，預料雙方合演入球騷，捧大。（周四凌晨2時45分開賽）

「幼獅」英格蘭只有3分在手，由於佢哋首仗輸畀葡萄牙，若然今場和波，而瑞典擊敗葡萄牙，英軍就會因對賽成績較差，未能出線。因此，領隊修夫基根本冇得選擇，點都要先下手為強，力搶3分。「幼獅」勝在鋒線人腳強，淨係一個哈利卡尼已經可以嚇窒對手，呢位熱刺射手兩戰仍未開齋，好大程度上因為球季收咧後，抖咗一排影響狀態，但經過兩場大戰，相信可以重新掌握比賽節奏，以佢嘅級數，踢U21賽事超晒班，意軍難以招架。

意大利U21兩戰得1分，今場必須贏波，先至有望出線，被迫焗攻。事實上，意軍上仗鬥葡萄牙，佔上風，12次射門有6次中目標，最終互交白卷，實屬可惜。現時形勢迫使佢哋豁出去一搏，肯定攻得更猛。意大利前鋒杜文尼高貝拉迪去季意甲轟入15球，絕非泛泛之輩，有力攻陷英軍大門。
葡軍玩拉布「細」在必行

同組葡萄牙U21對瑞典U21同時間開波，葡萄牙和波都可以出線，或會採取「拉布」戰術，力保不敗。佢哋今屆兩戰未失過波，只入1球，瑞典好難咬得入葡萄牙，揀入球細。