銀河回勇強爆伐木者

猪拉多纳

美職王者強勢回歸！上屆美職總冠軍洛杉磯銀河季初甩轆，喺總排名更一度跌到15位，不過隨住銀河近兩場均取得大勝，正式宣布佢哋返晒嚟，聽朝銀河會喺主場迎戰排名高一位嘅波特蘭伐木者，銀河主場戰績勁，撐主Ｗ！（周四早上11時開賽）
海灣者受讓攻「城」

銀河喺西岸嘅作客成績衰到冇人有，排緊包尾，不過主場就差得遠嘞，9戰6勝，仲犀利過西岸一哥西雅圖海灣者，認真誇張。唔講遠嘅，就講吓佢哋最近兩場主場戰績，分別喺美職盃同美職，大炒伊利特6比1同費城聯5比1，伊利特係業餘球隊就冇嘢好講喇，咁連費城聯都輸1比5就證明銀河班球員嘅狀態同士氣都返晒嚟。伐木者今場有中場戴朗艾斯派拿因傷避戰，但佢哋作客麻麻好難擔保可以全身而退，主勝捧得過喎。

阿King再講多兩場美職，頭場有費城聯主場對西雅圖海灣者，啱啱先講完費城聯上場被銀河大炒，今場竟然要讓排緊西岸榜首嘅海灣者，唔係唔揀海灣者讓球勝吓話？另一場就由科羅拉多急流作客奧蘭多城，急流作客戰績雖然唔算標青，但總算守得好，今季7場作客有4場係可以保持清白，其餘3場都只係失得1球，今場或者守到奧蘭多城都唔定，一於捧細。