智利好默契踢走烏拉圭

猪拉多纳

美洲盃8強開戰！

有玩過《FIFA》足球遊戲嘅球迷，對「球員默契度」應該唔會陌生，但如果將呢項設定套用喺今屆美洲國家盃主辦國智利之上，相信象徵默契度最高嘅綠色，亦未必足以表達到佢哋有幾咁夾！想知智利班波到底有幾掂？佢哋聽朝喺8強迎戰烏拉圭，一於捧1.67倍主勝，擔定櫈仔睇表演啦！ （now681台周四早上7:30直播）

智利近3次躋身美洲盃8強都冇好下場，分別不敵墨西哥、巴西同埋委內瑞拉出局。但相比睇往績，筆者更重視近況，喺分組賽階段斬獲10球嘅智利，即使撇除玻利維亞嗰球烏龍波，埋單9球亦多過巴西同阿根廷兩大南美勁旅喺小組賽嘅入球總和，強大火力令人聞風喪膽！
智利多1日休息備戰

智利鋒力咁猛，全因一眾球星「默契度」爆燈，3場分組賽除咗中場司令塔阿歷斯山齊士入波外，維達爾同伊度亞度華加斯等幾名中前場猛將，更係入波助攻瓣瓣有，進攻得分點多到咁，烏拉圭班後衞真係防不勝防！

再講，智利本來較烏拉圭多1日時間休息同備戰，佢哋最後嗰輪分組賽鬥玻利維亞，領隊森柏奧利仲早喺下半場一開波就換走維達爾同阿歷斯山齊士，今場喺體能方面會佔有一定優勢。森帥賽前話到明，即使嚟到淘汰賽亦唔會改變主攻踢法，仲使怕冇波入咩？
烏拉圭冇前鋒識入波

另邊廂，烏拉圭今屆美洲盃表現唔對辦，分組賽平均傳球成功率掹車邊得7成，唔單止同智利（85.23%）差一大截，佢哋仲冇個前鋒識入波，卡雲尼、迪亞高洛蘭同艾保靴南迪斯喺今屆美洲盃都未開齋，加上智利喺賽前作針對性部署，苦練防守頭槌阻止高甸同荷西基文尼斯兩條大杉靠頭槌搵食，烏拉圭今場要撕破智利防線唔係易事。

仲有，今屆場場踢足嘅左閘艾華路佩雷拉，因為黃牌夠數要坐波監，烏拉圭領隊泰巴尼斯無論搵司職右閘嘅富斯尼做「替工」，定派國家隊新丁加斯頓施華落場，防守力都難免打折，點頂得住智利嘅狂轟猛炸呀？