半和筍到秘

猪拉多纳

玻利維亞一開波就守

在智利舉行嘅美洲國家盃，聽朝續演8強戰，由玻利維亞硬撼秘魯。雖然秘魯係上屆季軍，但呢班波鋒線近期冇晒火，今仗仲有盧巴頓同波爾隆兩名中場主力坐波監，實力受削，面對牌面下風，一心由頭守到尾博和射12碼嘅玻利維亞，秘魯要喺比賽前段攞到甜頭難度唔細，況且往績顯示秘魯勁旺半場和，呢場一於追多鋪！

(now 681周五早上7時30分直播)
「高原球隊」有進步

玻利維亞係出晒名嘅「高原球隊」，喺高海拔主場就好惡，但一離開高原就變咗唔識踢波，不過今屆終於有突破，喺A組首仗先和墨西哥，之後更勇挫實力唔曳嘅厄瓜多爾，儘管尾場慘吞智利5蛋輸得幾肉酸，但唔好忘記對手有主場之利，整體嚟講玻軍有明顯進步，並非一冇高原主場庇佑就任人魚肉，況且最近4次對秘魯全部打和，加上効力中超嘅射手馬些路摩蘭奴狀態唔曳，有打突擊嘅本錢，因此今仗牌面雖稍遜，但並唔係冇得打。
秘魯火力曳 兩主力停賽

秘魯今屆表尚可，喺C組僅負巴西一粒同悶和哥倫比亞兩大勁旅，加埋擊敗委內瑞拉共擸4分打入8強，不過上屆神射手荷西古里路今屆仲未開齋，腳風認真唔順，經常要勞動到36歲嘅老將比沙路救駕，火力不足嘅問題浮晒面。禍不單行，秘魯兩大中場盧巴頓同波爾隆今仗都要坐波監，兩人攻守兼備打仔格，雙雙缺陣都咪話冇傷。

秘魯一向擅打反擊，若果要佢哋主動出擊進攻，反而會企咗喺度唔識踢，因此對住一啲牌面較低嘅球隊，往往都贏得好辛苦，好似分組賽對委內瑞拉，就係靠後備入替嘅比沙路於末段神來之筆先至險勝。玻利維亞亦有自知之明，而且踏入淘汰賽，預計佢哋會踢得更加保守，秘魯要攻破玻軍城池絕非易事。睇番秘魯之前5場比賽，全部開出半場和，加上近4次交手有3次開半場和，既然秘魯咁旺半場和，值得再追。