「黃金拍檔」停賽 秘魯讓「玻」有暗湧

猪拉多纳

近4次對賽贏唔到玻利維亞

美洲國家盃8強戰繼續上演，玻利維亞會喺聽朝大戰秘魯。雖然玻利維亞牌面擺到明係稍為輸蝕，不過秘魯都有中場「黃金拍檔」盧巴頓、波爾隆要坐波監，讓雙車組織力勢必大減，而且佢哋近4次對賽都贏唔到玻利維亞，咁嘅情況出事真係唔奇，讓平半情願冷敲2.25倍下盤。

（now681台周五早上7:30直播）

玻利維亞喺分組賽無關痛癢嘅最後一戰慘吞東道主智利5蛋，睇賽績的確幾得人驚，而且効力中超FC長春嘅馬些路摩連奴，暫時只得1個12碼入球，整體實力都咪話唔削。不過咁，向來離開主場就唔識踢波嘅玻利維亞備戰勁積極，早前曾拉隊去阿根廷集訓，佢哋喺分組賽以3:2打沉厄瓜多爾，唔係靠運就做得到。
玻利維亞備戰積極

對手秘魯喺分組賽0:0悶和哥倫比亞，頭場對巴西又只係輸1:2，睇落似乎對辦好多。問題係佢哋今場有盧巴頓同佢嘅中場拍檔波爾隆停賽，根本冇夠分量嘅球員可以頂佢哋個位，特別係盧巴頓同波爾隆喺士砵亭水晶夾慣夾熟，冇咗呢對中場拍檔，秘魯中場線隨時會倒瀉籮蟹。

雖然有人會覺得秘魯仲有比沙路同荷西古里路攻堅，贏面點都高啲，但唔好忘記佢哋已經連續4次對賽贏唔到玻利維亞，呢兩位三字頭嘅「長老」面對玻軍守將未必搵到食。而且秘魯只讓平半擺到明唔夠狠，咁有保留法定時間真係隨時難分勝負，冷敲玻利維亞仲易有驚喜！