美斯發功撐主W

猪拉多纳

美洲國家盃明早上演8強大戰阿根廷鬥哥倫比亞。「潘帕斯雄鷹」現時狀態同士氣俱佳，剛過咗28歲生日嘅美斯自領軍阿根廷國家隊後從未贏過大賽冠軍，由於兩代球王比利同馬納當拿都未贏過美洲國家盃，美斯今次如能奪冠，就可證明自己係真正「球王」。阿根廷今場面對喺分組賽表現平平及中前場多名主力停賽嘅哥倫比亞，預料美斯將繼續發功，助球隊晉級，推介1.73倍主W。（now 681周六早上7時30分直播）
全力衝冠 做真正球王

阿根廷喺分組賽表現唔錯，除首仗領先兩球下被巴拉圭逼和外，其餘兩仗都贏烏拉圭同牙買加1比0，以首名晉級。雖然不少評論認為阿根廷贏嘅兩仗都只能小勝，表現唔算Sharp醒，尤其攻力唔係太掂。不過，現代足球始終以防守行先，佢哋兩場都能零封對手，完全符合「想贏冠軍先要做好防守」呢個理論。何況阿根廷現時有乜傷兵，連上仗缺陣嘅阿古路亦可復出，配合美斯同迪馬利亞攻堅，有力射破對手大門。

美斯自05年起代表國家隊征戰，但至今仲未贏到國際大賽。事實上，兩代球王比利同馬納當拿都未曾染指過呢項洲際錦標，如美斯今屆能夠奪冠，可以話係完成兩代球王都做唔到嘅事，意義重大。另一直有評論認為從未帶領阿根廷贏大賽冠軍嘅美斯未能算係真正「球王」，故今次係美斯最佳「正名」機會。
法卡奧死火 巴卡停賽

哥倫比亞喺今屆美洲國家盃表現一般，除擊敗巴西一仗外，其餘兩場都踢得麻麻，主力前鋒法卡奧狀態低沉，就算有占士洛迪古斯同古達度嘅輸送都入唔到波。哥倫比亞本來仲有踢緊西甲西維爾嘅前鋒卡路士巴卡可用，但此子前仗與巴西球星尼馬發生衝突而要停賽，而中場山齊士摩蘭奴同艾雲華倫西亞亦分別因停賽及重傷唔踢得，個陣咁殘，單靠態沉嘅法卡奧相信難以攻破阿根廷大門，阿謙睇好阿根廷可以贏波入4強，主W有1.73倍相當值捧。