森巴生牯仔不勝無「圭」

猪拉多纳

紅軍孖寶騷哥利

聽朝美洲國家盃8強壓軸戲碼，巴西同巴拉圭將會師智利康塞普西翁。咪睇「森巴兵團」鋒線缺少王牌尼馬就以為佢哋好恰，原因係佢哋件「生牯仔」羅拔圖法明奴頂檔一樣掂，上場孭飛即刻入波證身價。最近扑錘過檔利物浦嘅法明奴，賽前記招豪言要做齣好戲，今場佢會夥拍菲臘比古天奴首以「紅軍孖寶」姿態亮相，當然要趁機騷哥利，巴西讓半一嘅1.85倍上盤咪走雞！（now681台周日清晨5:30直播）

尼馬緣盡美洲國家盃，唔少人都擔心巴西會係咁先，不過羅拔圖法明奴、菲臘比古天奴兩名國家隊新丁，反而趁住「大佬」缺陣乘勢崛起。上仗鬥委內瑞拉難得首次孖住正選落場，兩個都踢得有板有眼，法明奴仲斬獲個人今屆美洲盃首個入球，呢對「紅軍孖寶」今場再度並肩作戰，相信又係爭上位嘅好時機！
法明奴大口氣要捧盃

羅拔圖法明奴喺賽前發表「上位宣言」：「尼馬停賽我哋當然好傷心，但巴西會踢得愈嚟愈好，我哋可以捧走美洲盃。」或者大家會覺得法明奴大口氣，但實情係相比頭兩場分組賽側重被對手盯死嘅尼馬派牌，上場鬥委內瑞拉「紅軍孖寶」嘅組織更流暢同直接，埋門機會亦較尼馬在陣時多，「生牯仔」爭上位，冇咗尼馬隨時有更大空間。

巴拉圭
老弱殘兵難捱

巴拉圭方面，希度華迪斯、巴里奧斯、域陀卡沙利斯、保羅達施華等巴拉圭三線骨幹球員係就係經驗豐富，佢哋喺上屆美洲盃8強更協助巴拉圭喺法定時間摸和巴西，然後仲射贏12碼晉級。弊在呢班主將家陣最少都「三張嘢」，中堅保羅達施華仲已經「三十有五」活力大不如前，當打中場李察奧迪斯又黃牌夠數要坐波監，對住活力十足嘅「森巴兵」跑到氣咳都似！