札幌1.83倍主勝好分頭

猪拉多纳

誓破「黑星方程式」定律

日乙「六哥」札幌岡薩多今季有條「黑星方程式」，每逢遇到啲連場不勝嘅下游隊伍，例牌送3分畀人做善事，堪稱日乙善長仁翁，但係今日佢哋主場對住10戰不勝嘅大分三神，就決心打破呢個定律，1.83倍主勝不妨一博。（開賽時間：周一晚6:00）

札幌呢隊波好騎呢，論人腳並唔差，小野伸二、稻本潤一更加係過氣日本天王巨星，按理喺日乙夠殺有凸。不過，今季佢哋所輸嘅3場波，包括對長崎成功丸、京都不死鳥同熊本羅亞素，都係喺對手連場不勝、個勢頹爆嘅情況下輸波，所以畀日本傳媒笑佢哋有條「黑星（日文解敗陣）方程式」，認真丟架。
大分近10戰作客不勝

今日札幌主場迎戰榜尾嘅大分，咁啱對手就創造咗個10戰不勝嘅「輝煌」戰績，自不然令人擔心佢哋又再中地雷。所謂前車可鑑，稻本賽前就走出嚟話唔會諗對手嘅排名，決心以贏波為目標，事關札幌家陣排第6，落後「三哥」金澤只係4分，想升班就唔可以再响弱旅腳下失分。

雖則小野伸二呢件玻璃腳傷咗一排，6月起做番後備計劃復出之際，早兩日又話個左邊膝頭唔多妥，走咗去醫院檢查，但係札幌冇咗佢咁耐，一樣踢得妥妥當當，根本就冇乜影響。何況前鋒拿沙列、中場荒野拓馬幾個都好番晒，後衞福森晃斗呢排又腳風好順，啲死球劑劑有威脅，月初對千葉就罰球直接建功。而且大分過去10次作客北海道得3和7負，今次想問札幌攞3分比較難，都係認命輸波罷喇。