阿根廷老鼠拉「圭」

猪拉多纳

好牌唔識用 前線死晒火

美洲國家盃踢到白熱化階段，最後4強智利、秘魯、阿根廷同巴拉圭都由阿根廷籍主帥執教，從教練層面睇，阿根廷當然係大贏家。不過回歸球隊層面，「潘帕斯雄鷹」鋒線雖則球星如雲，教頭馬天奴手執成手好牌但表現始終低過預期，王牌美斯仲經歷超過800分鐘入球荒，佢哋聽朝4強鬥巴拉圭讓一球制唔過，捧下盤划算。 （now681台周三早上7:30直播）

美斯、阿古路、泰維斯、希古恩、拿維斯加迪馬利亞，阿根廷鋒線選擇真係要邊瓣都有，但教頭馬天奴偏偏揸住副好牌唔識打，今屆美洲盃踢4場僅斬獲4球，入波仲少過今仗對手巴拉圭，唔單止火力一啲保證都冇，更惹嚟唔少傳媒同粉絲批評馬天奴嘥晒呢班球星。
美斯800分鐘未入過「生波」

最慘係喺巴塞隆拿入波執豆咁執嘅美斯，一返到阿根廷國家隊跟住馬天奴即刻冇啖好食，撇除熱身賽同埋12碼，呢位阿根廷球王已經超過800分鐘未喺正賽入過「生波」，對上嗰球要數到馬天奴仲未接掌帥印、上年巴西世界盃決賽周分組賽鬥尼日利亞，睇怕美斯今場都幾難打破入球荒。
巴拉圭遇3強憑後勁不敗

另邊廂，巴拉圭領隊雷蒙戴亞斯今仗賽前向祖國大笠高帽，激讚阿根廷係全球最佳國家隊，但亦讚揚巴拉圭值得所有球隊尊重。的確，巴拉圭陣中雖然老將成籮，希度華迪斯、巴里奧斯同域陀卡沙利斯等全部最少「三字頭」，但佢哋今屆先後對住阿根廷、烏拉圭同巴西3支南美勁旅，都能夠喺落後下逼和對手，嗰種後勁同韌力唔到你唔服。既然佢哋分組賽鬥阿根廷都可以踢成2:2唔使輸，今場又有中場猛將李察奧迪斯坐完波監復出，絕對有力同阿根廷周旋。