野兔回巢 河床有待磨合

猪拉多纳

美洲國家盃曲終人散，阿甲聽朝將會重開，打頭陣有堤格雷主場對河床嘅獨腳戲。阿甲近期深受球迷關注，因為幾位膾炙人口嘅阿根廷球員趁休戰期間重返阿甲賽場，包括河床嘅路爾斯干沙利斯同沙維奧拿，而泰維斯亦重返母會小保加，令重開嘅阿甲顯得星光熠熠。

阿甲一向畀人感覺係本土年輕球員出外搵食嘅踏腳石，以及喺外流闖蕩多年球員嘅最後一個落腳處。不過，今夏阿甲竟然吸引唔少當打球星回歸，當中以2000年為河床贏得阿甲冠軍嘅「野免」沙維奧拿最令人關注，加上「野兔」當年好拍檔、「小丑」艾馬早於一月已加盟河床，兩人雖然已三十多歲，但仍有力喺阿甲立足；配合2003年助河床贏得阿甲冠軍嘅中場路爾斯干沙利斯亦重返母會，令河床一時間備受外界注目，大有挑戰冠軍之勢。
堤格雷主場不敗受讓筍

河床嘅「死對頭」小保加亦唔執輸，以多名年輕球員外借權換來泰維斯嘅回巢。泰維斯上季喺祖雲達斯嘅表現異常出色，返到水準次一級嘅阿甲相信會更易入波，對自2011年後未有贏過阿甲冠軍嘅小保加嚟講，絕對係及時雨。至於堤格雷主場對河床嘅賽事，前者今季喺自己地頭未輸過，面對剛於上周末阿根廷盃落敗有待磨合嘅河床，有力保住不敗身，堤格雷受讓捧讓球主勝。（周四早上7時10分開賽）