花旗兵贏兩粒閒閒「地」

猪拉多纳

新舊美國隊長拍住上

聽朝繼續有美洲金盃賽事上演，暫列A組榜首嘅美國會喺主場迎戰海地。論實力美國當然喺對手之上，加上一對新舊美國隊長上仗齊齊發威盡顯功架，「花旗國」有力贏多場提早鎖定出線席位，贏海地兩粒開「讓球主勝」難度唔高吖！（開賽時間：周六早上8:30）

美國射手丹普西喺今屆比賽之前，遭領隊奇連士文「搣柴」，換由中場米高巴特利戴上隊長臂章，一度令人擔心「花旗兵」隊內士氣受挫，幸好事實證明呢兩位新舊美國隊長並冇不和之餘，相反丹普西卸任隊長後可以專注爭取士哥，上仗即梅開二度帶領「花旗兵」以2:1殺退洪都拉斯，其中致勝一球更加係由新隊長米高巴特利送上助攻添！
海地實力未入流

賽後丹普西盛讚對方係真正嘅領袖，認同米高巴特利係合適嘅隊長人選。既然美國兩大巨頭可以通力合作，呢鋪對住同組最弱嘅海地肯定殺無赦。

對手海地上仗鬥巴拿馬大部分時間捱打，可以執番分的確有運。雖然話佢哋近8次同美國交手只係輸過2次，不過雙方最近1次碰頭已經要追溯到6年前，須知美國近年實力不斷冒升，就算對住世界列強亦有一拚之力，呢次對住未入流嘅海地，要贏兩粒提前晉級唔係難事囉！