多摩川打吡大騷Encore

猪拉多纳

經過半個月小休，日職今午展開次階段賽事，首輪重頭戲係多摩川打吡川崎前鋒主場火併FC東京。川崎前鋒首階段作客完場前由贏變輸，今仗發誓復仇，面對前線有多名新兵兼近況大勇嘅FC東京，預料係一場入球騷，1.73倍大盤係不二之選。（有線61及201台周六下午5時30分直播）

兩軍對多摩川打吡戰素來特別重視，首階段前鋒作客，憑王牌射手大久保嘉人上半場建功，射入佢個人日職第140球取得領先優勢，可惜後防大將車屋紳太郎下半場中段被逐，跟住畀東京追和，末段仲畀東京王牌武藤嘉紀絕殺，輸得好唔忿氣。該役罪人車屋紳太郎賽前特別肉緊，發誓話今日必定復仇。前鋒首階段聯賽排第五，入球僅次於冠軍浦和紅鑽，但失波卻係前十名球隊中最多一隊，一向識攻唔識守，佢哋啱啱星期二同德甲多蒙特拍跳，面對勁敵竟然排出「343」主攻陣式，結果慘吞六蛋，不過計攻勢同控球時間都唔比對手少，大敗只係輸質，經過一場硬仗後已操起狀態，而且中場新星大島僚太終於傷愈，喺對多蒙特復出擔正，二號射手小林悠亦可上陣，今仗同大久保嘉人喺前線合作攻堅，回復十足火力。
客軍尼敦般斯級數高

FC東京係首階段聯賽亞軍，攻守比川崎前鋒更平均，近四場聯賽取得全勝佳績，雖然王牌球星武藤嘉紀離隊轉投德甲緬恩斯，但另一箭頭前田遼一狀態大勇，而且為填補武藤嘉紀空缺，球隊一口氣引入三名新兵，包括來自威靈頓鳳凰嘅尼敦般斯，呢位27歲中鋒以13個入球成為鳳凰首席射手兼澳職最有價值球員。球隊另外仲引入咗西乙基羅納鋒將辛達斯，同向西乙薩瓦德爾回收25歲嘅青訓右翼田邊草民，再加上中場大將羽生直剛傷愈復出，今仗作客都夠料同川崎前鋒駁火。