謝四銀河首戰執身彩

猪拉多纳

謝拉特在洛杉磯銀河首戰，Hea踢半場冇貨賣！美國舉行嘅「超重量級熱身賽」國際冠軍盃昨晨揭開戰幔，萬眾矚目嘅「銀河新兵」謝拉特正選披甲，但踢咗45分鐘就被換離場，令「謝迷」好冇癮。「謝老四」仲因1次「散步式」防守失位，間接導致失波，甚有「世紀跣腳」影子，好彩隊友幫到手，銀河最終主場以2比1反勝CF阿美利加，令謝拉特唔使做「黑腳」。希望周三早上美聯盃8強作客皇家鹽湖城，謝拉特可以打真軍顯身價啦！

身穿招牌8號波衫嘅謝拉特，明顯仲未上力，開波8分鐘就孭鑊，佢行住睇波，走甩身邊嘅卡路士昆特路，無力回追，造就呢位前鋒單刀射破洛杉磯銀河大門，不禁令人想起前季英超季尾利物浦對車路士，謝拉特跣腳，益咗丹巴巴亞單刀入波，斷送爭標機會，估唔到呢位35歲英格蘭名將加盟銀河首場比賽，即重溫噩夢。「謝老四」之後嘗試將功補過，最有威脅1次係殺入禁區起腳，但欠缺角度，被CF阿美利加門將曉高干沙利斯擋出。好彩謝拉特前利物浦隊友羅比堅尼大勇，臨完上半場控定妙射建功，扳平1比1。
周中美聯盃等運到

由於銀河將於周三同皇家鹽湖城踢美聯盃，教練艾連拿半場休息時，一口氣換走謝拉特、羅比堅尼等多位球員，「謝迷」難免失望。不過銀河後備兵夠生性，戰至80分鐘，由阿倫哥頓攻入致勝1球，贏CF阿美利加2比1，「謝老四」總算以勝利開局。

賽後謝拉特話感覺良好：「個人來講，感覺唔錯，但體能上始終比較吃力，畢竟已經6至7星期冇比賽，我要盡快同隊友建立默契，希望嚟緊美聯盃可以有更多上陣時間，同埋準備好美職對聖荷西地震。」艾連拿力撐謝拉特表現不俗，但認為要踢多幾場，先至可以融入球隊，會再了解謝拉特嘅情況，再決定是否派佢對鹽湖城，似乎有保留喎。