富明尼斯肥約招細哨「回家」

猪拉多纳

「細哨」重投祖家懷抱！朗拿甸奴早前同墨西哥球會克雷塔羅解約後，終於有班落，呢位前世界足球先生重返巴甲，加盟富明尼斯。「細哨」同新東家簽約到2016年底，根據合約，佢除咗獲得60萬雷亞爾（約147萬港元）月薪之外，就連球會波衫同產品銷售都有分紅，每月最多可額外再有20萬雷亞爾（約49萬港元）進帳，以35歲高齡來講，每月有接近兩百萬港紙落袋，梗係開心啦！難怪佢未等到球會正式公布，就率先喺個人社交網發放印有自己名字嘅10號新波衫同粉絲報喜。