美國巴拿馬細均力敵

猪拉多纳

分組賽謝幕戰唔使去盡

聽朝美洲金盃A組上演最後一輪分組賽，由提早奪得首名出線嘅美國，迎戰次席巴拿馬。美國雖然喺A組2戰全勝，不過夾埋入得3粒，火力冇想像咁強。何況佢哋好大機會收起個別主將留力淘汰賽，呢鋪對住仲要搶分爭出線嘅巴拿馬唔似咁易咬得入，都係揀1.75倍入球細穩陣啲。 （開賽時間：周二早上9:30）

美國早前揮低洪都拉斯同海地，鎖定小組首名出線資格，之不過班波演出未見說服力，呢2場波嘅攻門次數同樣少過對手一大截。值得留意嘅係，「花旗軍團」射手艾迪杜里啞火，連續2仗食白果之餘更提早被調離場，只係倚靠老牌前鋒丹普西一個孭起士哥重任。
穩奪首名資格 美國或收起主將

雖然呢件32歲射手兩戰射入3球腳風勁順，但唔通下下旨意佢發威咩？更何況美國已經夠分出線，領隊奇連士文隨時收起射手丹普西等一眾主將有咩出奇先？就算畀佢哋落場，都睇怕係隨時hea踢就算，仲點旨意呢班「花旗兵」開入球騷先？
巴拿馬贏波亦出線

對手嘅巴拿馬話晒都係上屆亞軍，當年喺決賽對住精銳盡出嘅美國亦只係僅敗0:1，證明佢哋冇想像咁弱。況且佢哋贏波就入到8強，成班巴打呢鋪仲唔搏埋條命咩？仲有呀，佢哋嘅外流球員路爾斯迪查達上仗有波入，狀態唔錯。睇番數據，兩軍近6次交手開出5口入球細，咁好路不妨追多次啦。