紅軍曼谷歎細界

猪拉多纳

亞洲之旅首站拍跳泰國明星隊

利物浦亞洲之旅熱身賽第1站，今晚作客曼谷對泰國明星隊！紅軍今夏轉會市場動作多多，已簽下6個新兵，矢志重振雄風，但新球員磨合需時，預料領隊羅渣士會趁季前盡量試陣，搵出最佳陣容，勝負並非首要考慮因素，加上今場鋒線人腳不整，入波唔容易。泰國明星隊出戰外隊表現非常醒神，5月對英超冠軍車路士僅負0比1，有力頂得住開操冇幾耐嘅利物浦，最好揀入球細。

（有線61、64、201及203台周二晚9時直播）
無「鋒」欠態難頂高溫

利物浦上季成績令人失望，羅渣士幾乎下台，佢今夏不敢怠慢，大肆增兵，簽入前鋒丹尼艾格斯、中場占士米拿同羅拔圖法明奴、後衞約瑟高美斯及尼達利基尼、門將阿當保丹，實行三線大翻新。不過，呢班新兵並非頂級球員，能否大幅提升球隊實力仍有待觀察。何況最有睇頭嘅巴西國腳羅拔圖法明奴踢完美洲盃後，同另一巴西中場菲臘古比天奴仍未歸隊，紅軍今次進攻人腳並唔完整。

此外，兩個意大利前鋒巴洛迪利及波連尼亦被留喺英國等出售，射手史杜列治仍未傷愈，利物浦鋒線非常單薄，加上開操後首場賽事，相信球員未谷起狀態，更要喺泰國攝氏30幾度炎熱天氣下比賽，舉步維艱。

泰國明星隊集合本土精英，唔可以睇小，球員難得可以同歐洲豪門交手，自然更加落力，戰意肯定比「遊埠」嘅利物浦高。泰國明星隊5月尾對車路士，只係輸0比1，並唔失禮，面對「無 鋒」紅軍，唔會大敗，入球細好路。