踢走反骨仔安樂晒 紅軍玩轉泰星隊

猪拉多纳

遠東之旅第1擊

利物浦今晚正式展開遠東之旅，首站會到訪曼谷出戰泰國明星隊。「紅軍」陣容雖然唔係最強人腳，但占士米拿、丹尼艾格斯等新援要搏盡爭上位，「反骨仔」史達寧跳草裙舞一事解決亦有助提升士氣，今仗喺新隊長佐敦軒達臣領軍下，要清脆贏波打響頭炮話咁易，小讓1球必撐1.53倍「讓球客勝」！ （有線61、64、201及203周二晚9:00直播）

「紅軍」今夏遠東之旅將前往泰國、澳洲同馬來西亞，完成4場熱身賽後，再轉赴芬蘭同赫爾辛基作最後拍跳。「紅軍」日前公布今次「東征」大軍名單，扭計轉會兼疑似詐病缺操嘅史達寧竟然榜上有名，真係唔明領隊羅渣士諗啲乜，好在前晚曼城同利記就呢名「反骨仔」嘅交易終達成協議，可以話一天都光晒！
巴西雙星延長假期

老實講，史達寧上季踢得勁麻麻，成日死扭爛扭搞到進攻斷纜，今次冇佢喺度阻住地球轉，加上巴西雙星菲臘比古天奴及羅拔圖法明奴獲准延長假期，箭頭史杜列治、巴洛迪利同波連尼又冇份踢，丹尼艾格斯、占士米拿同佐敦伊比等中前場新援同後起之秀，實趁機騷哥利博取羅渣士歡心，加埋從里爾外借回收嘅奧歷治為喺「紅軍」立足肯定搏盡，今場又係新任隊長佐敦軒達臣首度領軍出征，點可以唔贏得好好睇睇先？何況「紅軍」4訪泰國取得3勝1和未輸過添。
泰美混血中場踢唔掂美職

泰國明星隊陣容以曼谷聯10件兵為骨幹，其中泰美混血兒中場Ampaipitakwong，更踢過美職聖荷西地震，可惜佢未能喺美國站得住腳之餘，曼谷聯呢支泰超球隊家陣只位處聯賽榜中上游，戰鬥力唔算太強，相反傳統勁旅武里南聯同蒙通聯，今次各得1名球員入選，相信呢支明星隊實力好極有限囉！