4大強援登場曼聯加料搶頭彩

猪拉多纳

今夏最矚目熱身賽國際冠軍盃開始進入戲肉，聽朝由上屆冠軍曼聯揭開豪門登場序幕，喺美國西雅圖出戰墨西哥球隊CF阿美利加 ！紅魔鬼領隊尹戈爾再次喺轉會市場重錘出擊，簽入舒韋恩史迪加、迪比、舒尼達連、達美安4大強援，打造全新金鑽陣容，今仗首度出擊當然唔想失威，必定去盡晒冷，務求大勝攞彩。CF阿美利加人腳質素較遜，加上6日內連踢3場，體力輸蝕，預計難逃「魔」掌，捧曼聯讓球客勝。

（有線61、64、201及203台周六早上11時05分直播）
小豬鎮中場 釋放朗尼

曼聯上季豪使過億鎊買人，但效果一般，尹戈爾針對個別位置今夏再增兵。當中以羅致德國國腳舒韋恩史迪加最令人期待，事關球隊一直欠缺正宗中場指揮官，搞到要朗尼要回後校炮，導致鋒線失去最有威脅嘅射手。依家有「小豬」幫手，加埋舒尼達連，大大增強紅魔鬼中場組織力，朗尼可以專心數胡，提升球隊射門命中率。由燕豪芬來投嘅荷蘭鋒線迪比，擅長憑個人技術突破，令進攻板斧更多元化。最起碼唔使好似上季經常大腳斬前，白白送控球權畀對手。既然中前場咁勁，尹戈爾應會趁熱身賽，打造更具侵略性嘅主攻戰術。至於意大利國腳達美安可勝任左右二閘，亦有利尹帥調動。
CF阿美利加預咗受靶

CF阿美利加已經踢咗兩場國冠盃，先係1比2輸畀洛杉磯銀河，上仗苦戰下反勝聖荷西地震2比1，事實上呢支中美洲球隊級數同曼聯有明顯距離。今次參賽更加係人腳不整，首席射手奧利比柏拉達、後衞雲度拿艾華拉度、保羅阿古拿、門將摩西斯蒙路斯，都去咗踢美洲金盃，今場撞正球星如雲嘅曼聯，相信預咗受靶，難逃大敗！