肥賓「巴利陣」「大」考驗！

猪拉多纳

皇馬第1戰

歐洲豪門訪亞洲搞推廣，已經成為暑假指定動作。就連今年第3屆國冠盃都衝出美國，聯同澳洲、中國合作舉行呢項暑假矚目盛事。今日下晝國冠盃喺澳洲墨爾本上演重量級大戰，由西甲豪門皇家馬德里，激鬥意甲勁旅羅馬，既然雙方目標旨在氹球迷開心，仲邊會縮埋死守咁掃興先？一於捧1.46倍大盤！

（有線61、64、201及203周六下午5:00直播）

今次係「銀河艦隊」首次到澳洲比賽，同時亦係新帥賓尼迪斯上任後第1戰，在公在私，「肥賓」梗係想入多兩粒，留個好印象畀當地球迷啦！除咗獲准延遲歸隊嘅中場占士洛迪古斯，同埋養傷嘅左閘法比奧干查奧缺陣，一眾皇馬主力包括C朗、加里夫巴利、賓施馬等「士哥拿」，加上新加盟、助攻力強嘅右閘丹尼路雷斯通通隨隊出征，咁大「卡士」，點會冇士哥先？
改造巴利踢中鋒

賓尼迪斯上任後，雖然聲稱會提升隊波嘅防守能力，但實情佢係「靜靜起革命」！西班牙《馬卡報》爆料，話「肥賓」原來有意扶正加里夫巴利，將呢位威爾斯翼鋒改造為正箭頭，反而C朗、賓施馬、卻奧斯同莫迪歷等巨星，只係幫巴利開路，盡情釋放佢嘅火力！咁講真，論整體埋門能力，始終都係C朗高一班，賓帥隨時會喺呢一系列熱身賽，轉吓陣試踢雙箭頭陣式，兩大士哥拿都要爭取表現，「雌狼」守將呢鋪實有排忙！
羅馬簽澳洲小將 有半個主場

另邊廂嘅羅馬亦唔輸蝕，主力托迪、比真歷、迪羅斯等人悉數候命，班波勝在今季人腳變動唔大，講默契，一定比換帥冇耐嘅皇馬優勝。何況「雌狼」今仗隨時贏埋人氣，皆因佢哋由珀斯光輝引入18歲澳洲天才中場丹尼爾達施華，據講呢位小將今日好大機會落場，變相吸引到唔少當地球迷入場自動加入「狼幫」，為羅馬打氣，有晒默契同支持，仲點可以唔數胡報答球迷吖！咁嘅情況，都係玩入球大最划算！