機員主場翻嗒火燄

猪拉多纳

基卡馬拉射術勁過韋拿

美職清晨有場獨腳戲，哥倫布機員坐鎮主場迎戰芝加哥火燄，查實呢兩隊剛於上輪聯賽碰過頭，哥倫布機員作客都全取3分，今仗喺自己地頭出擊，勝算自然更加高。尤其是火燄今季作客8戰未嘗1勝，可謂正宗作客蟲，睇怕今場再次束手就擒，哥倫布機員主W仲有1.7倍，非常抵玩。（TVB 301周一清晨5時直播）

近年愈來愈多球星前往美職搵食，令呢個聯賽生色不少，哥倫布機員今季最大收穫係簽入米杜士堡前鋒基卡馬拉，呢位塞拉利昂國腳以往曾効力過機員同聖荷西地震等美職球隊，可以迅速適應比賽環境，數字亦證明一切，基卡馬拉今季已有13球進帳，高踞射手榜榜首，包括上仗作客射入全場唯一入球，以1比0擊敗火燄，比其他球星好似韋拿及羅比堅尼等仲要勁。除咗基卡馬拉外，機員鋒線上仲有希古恩嘅哥哥費迪歷高希古恩，防線有奧地利國腳普加迪斯助陣，攻守平衡，成為機員能夠佔據東岸前列嘅主因，加上主場兩連勝，水準可靠，今勻對住手下敗將芝加哥火燄，可再下一城。
火燄作客8仗未開齋

芝加哥火燄排東岸包尾，成績差主因係作客太曳，8次客戰仲未開齋，只得3和5負劣績。火燄近期更受傷兵問題困擾，首席射手艾卡姆、中場馬隆尼、拉倫杜域治因傷倦勤，另一位中場祖雲鍾斯踢緊美洲金盃未歸隊，人腳不整之下，更難同機員抗衡，1.7倍主Ｗ有買趁早。