鹿角作客醒 追殺山雅

猪拉多纳

另一場日職直播由松本山雅主場鬥鹿島鹿角。松本山雅上場慘吞廣島三箭六蛋，連首階段賽事已遭逢九連敗，鹿島鹿角近兩季嘅作客成績比主場更穩定，今場作客讓半一照捧上盤。（有線64及203台周日下午5時直播）

松本山雅次階段頭兩輪聯賽接連不敵浦和紅鑽及廣島三箭，上場對三箭更喺頭二十分鐘之內失咗三球，最後埋單輸夠半打，連同首階段聯賽及盃賽已連輸九場，士氣嚴重受挫，就算球隊搵嚟前三箭中場工藤浩平救亡，但正所謂孤掌難鳴，要靠一人之力令球隊翻生實談何容易。
撐上盤同半場客勝

鹿島鹿角上場喺主場被清水心跳逼和0比0，但呢班波近兩年嘅作客表現比起主場更穩定，首階後聯賽鹿角作客比主場多取六分，04年球季更係全日職作客成績最好嘅球隊，十七場聯賽取得十一勝，所以唔使擔心上場失分會影響球隊嘅爭勝信心。巴西射手達維已傷愈復出，對上兩場均以後備姿態上陣，預計狀態會進一步提升。松本山雅對上九場輸波有七次半場已落後，除咗捧鹿島讓半一嘅上盤，可以兼顧埋半場客勝。