銀河巴塞半場大好路

猪拉多纳

謝四哨牙蘇老友鬥晒冷

今夏最強熱身賽國冠盃好戲連場，明早巴塞隆拿喺美國加州對洛杉磯銀河尤其矚目，兩位前利物浦好拍檔蘇亞雷斯同謝拉特兵戎相見，準備做大Show！美斯、尼馬缺陣之下，「哨牙蘇」擔大旗，當然要趁機「騷哥利」入波顯功架；「謝老四」迅速融入銀河，同羅比堅尼非常合拍，剛於美職首演即建功。銀河火力全開，無懼同巴塞火併，Mic少首選2.05倍半場大。（有線61及201台周三早上11時05分直播）

巴塞四位主力美斯、尼馬、丹尼爾及馬斯真蘭奴踢完美洲盃獲准繼續放假，無緣今次美國之旅，球迷難免失望。不過「地上最強」勝在人腳充裕，陣中仍有蘇亞雷斯、恩尼斯達、拿傑迪錫，以及新簽中場阿達杜倫等進攻猛將，火力有保證。特別係「哨牙蘇」上季多演輔助角色，協助美斯、尼馬爭取入波，今仗蘇亞雷斯終於可以孭重飛，勢必全力胡數攞威，證明本身能力不亞於美斯及尼馬，今次為爭取表現，即使遇上老友謝拉特都冇面畀。
阿達杜倫「考試」實搏殺

由於巴塞受轉會禁令限制，阿達杜倫要等到明年一月先至可以註冊為巴塞喺正規賽事上陣，加上佢由馬體會加盟巴塞，交易有「退貨條款」，所以更加要把握熱身賽上陣機會盡顯身價，否則被「退貨」就喊都無謂。另巴塞陣中小將辛度拉美利斯、蒙尼亞艾哈達迪同樣要爭上位，呢支「半力巴塞」隨時比最佳陣容更具殺傷力。
羅比仔4仗省7粒弗爆

謝拉特已三次為洛杉磯銀河披甲，表現愈來愈上力，上仗在美職處子戰更加爭取到入波、助攻，並博到12碼，換言之三個入球都關佢事，明顯已操起狀態，大大提升銀河中場攻擊力，亦令射手羅比堅尼有更多埋門機會。羅比堅尼上仗大演帽戲法，加上早前國冠盃對CF阿美利加亦有波入，近四仗共轟入七球，腳風非常順，巴塞防線缺少丹尼爾及馬斯真蘭奴，必令羅比堅尼有機可乘。值得一提，銀河今仗「掛名」客隊，但其實比賽喺鄰近洛杉磯嘅玫瑰碗球場舉行，有大把球迷支持打氣，預計今仗有波入冧吓粉絲，捧半場大好路。