摩納哥星散緬恩斯W得

猪拉多纳

法甲摩納哥同德甲緬恩斯將於今晚喺瑞士踢熱身賽，摩納哥「星散」，最大筆收購只係簽入AC米蘭前鋒艾沙拉維，教練查甸有排執。緬恩斯最矚目新兵，肯定係日本前鋒武藤嘉紀，佢拒絕加盟車路士而選擇緬恩斯，就係想有更多機會上陣，證明實力，今仗等睇佢表演，捧埋緬恩斯客W。（周四凌晨1時開賽，馬會網上文字直播）

摩納哥近年深陷財困，連番出售球星，繼上年賣走占士洛迪古斯及外借法卡奧後，今夏又以3,500萬歐元，將中場干度比亞賣畀國際米蘭，同時又放走貝碧托夫、史基倫堡等高薪球員。新簽球員艾沙拉維、里昂中場巴路利、車路士中場柏沙歷、南錫門將保羅拿迪等，全部都係廿歲出頭嘅年輕小將，摩納哥由巨型班淪為搞青春班，新一季成績會大倒退。
武藤掛帥火力勁

至於緬恩斯放走日本前鋒岡崎慎司，但同時由FC東京簽入武藤嘉紀，呢位23歲射手被譽為日本球壇新希望，連車路士都想簽佢。由於上「車」後，難以同迪亞高哥斯達等球星爭位，為免步香川真司過曼聯嘅後塵，所以武藤選擇加盟緬恩斯，可見佢非常識諗，希望先喺二線球會證明身價，再爭取入豪門。

武藤嘉紀肯定會把握每次比賽機會「騷哥利」，有力帶來驚喜。今仗撞正實力大降呢嘅摩納哥，緬恩斯勝算甚高。