利物浦埋齋唔客氣

猪拉多纳

利物浦亞洲之旅來到最後一站，今晚將作客吉隆坡出戰馬來西亞明星隊。紅軍今次亞洲行最大收獲係新兵占士米拿火速融入球隊，成為中場新大腦，受賓迪基加盟消息刺激，相信利記有力大炒只屬「烏合之眾」嘅主隊凱旋返歐，推介讓球客勝。（有線61、64、201及203台周五晚8時45分直播）
占士米拿頂到謝拉特

利物浦之前喺泰國、澳洲踢咗三場熱身賽，比數上雖以首仗擊敗泰國明星隊最清脆，但講發揮其實對布里斯班獅吼及阿德萊德聯仲有隊型，當中新加盟嘅占士米拿成功喺中場發揮串連作用，而且連續兩場有士哥，功能上暫時嚟睇可以取代以往謝拉特擔當嘅角色。比利時國腳賓迪基已正式落實加盟，現時所見中前場確有人滿之患，落場紅軍為保前途，再冇Hea踢空間。
「馬國明」棄用柔佛兵

馬來西亞近年經常邀請歐洲勁旅到訪踢表演賽，不過通常只拉雜成軍以「明星隊」出戰，踢落完全唔夠打，今次20人大軍名單更棄用了上季聯賽冠軍柔佛DT成員，戰鬥力唔慌好得去邊。利物浦踢埋今仗便會飛返歐洲備戰新球季，相信球隊上下都希望以一場漂亮勝仗為今次亞洲之旅畫上完美句號，讓球主客和讓2球照捧讓球客勝。