皇馬隱形俠 讓唔起曼城

猪拉多纳

肥賓亂嚟比帥乘機復仇

國際冠軍盃今晚戲碼夠晒勁，曼城喺澳洲墨爾本對皇家馬德里，贏埋都唔奇。雖然曼城陣容不整，隊長高柏尼又話要返英國陪老婆生B，但皇馬王牌C朗明顯唔妥新教練賓尼迪斯，加上佢過去踢中鋒場場都冇貨交，今場又變「隱形俠」都唔奇，撐受讓半一嘅曼城1.72倍下盤。（有線61、64、201及203、廣東體育周五晚6:00直播）

由於前鋒迪斯高隨時被賣走，阿古路、費蘭甸奴、薩巴列達同迪米捷利斯踢完美洲國家盃後未歸隊，曼城日前同羅馬踢成2:2，最後要靠互射12碼至贏到波，最大鑊係隊長高柏尼仲返埋英國陪老婆，的確唔值得睇太高。之不過咁，曼城領隊比歷連尼曾經被皇馬炒魷，唔單止對敵軍底細了如指掌，今場有機會報仇，睇怕佢會排個靚陣威番次，繼續重用一嚟到就有貨交嘅「貪錢仔」史達寧。
首戰悶和羅馬

西媒喪插肥賓

另方面，皇馬喺國冠盃首戰同羅馬踢成0:0，衰到喺互射12碼輸埋波，西班牙傳媒用災難嘅開始喪寸賓尼迪斯，的確係「人之常情」。咁又係嘅，肥賓嗌C朗踢佢唔擅長嘅正箭頭位置，搞到佢成日要等波踢，戰鬥力大減，有傳聞又話賓尼迪斯要賣走C朗老友賓施馬，又話要扶加里夫巴利做皇馬新王牌，難怪C朗練波都發晒脾氣啦！咁嘅情況仲旨意佢搏命做救世主？咪玩啦！
16歲奧迪加特未夠班孭飛

事實上，現時皇馬嘅士氣真係插晒水，除咗隊長卡斯拿斯被趕扯，副隊長沙治奧拉莫斯又話要被清洗，即係兩大靈魂都冇晒，中場發電機占士洛迪古斯未歸隊，肥賓上仗已經搵B隊嘅16歲挪威新仔馬田奧迪加特打正選，堅嚇親唔少球迷，始終佢幾叻都好，畢竟冇歐洲主流聯賽作戰經驗，今場對住曼城班打仔格球員，好易出事，邊讓得起曼城呀？