紅魔防守升呢 唔怕冇火巴塞

猪拉多纳

迪基亞解凍 爭氣踢好波

貴為英格蘭首席前鋒，朗尼喺曼聯多年嚟先後擔任C朗、尹佩斯副手，冇乜機會踢正前鋒，今季佢終於等到「擔正」嘅機會，出任自己最鍾意嘅正前鋒位置，難怪佢鬥心爆棚咁話要用「士哥」作為回報啦！最重要係「紅魔」門神迪基亞解凍復出把關，防線即時升呢，聽日凌晨曼聯喺國冠盃北美站對住讓車馬嘅巴塞，不敗係最低要求，1.67倍「讓客」咪走寶。（有線61、64、201及203、廣東體育周日凌晨4:05直播）

朗尼多年嚟一直任勞任怨，翼鋒、進攻中場甚至連防守中場都踢過，難得佢射術冇退化，每季至少交出10個聯賽入球。隨住尹佩斯、法卡奧離隊，查維亞靴南迪斯不受重用，領隊尹戈爾今季決定對朗尼委以重任，對上2仗都派佢踢單箭頭，幫佢達成「擔正」心願。
朗尼踢正箭頭自信返晒嚟

等咗咁耐再有機會擔正，朗尼當堂醒神晒，仲提醒球迷話自己對上2次踢單箭頭，係佢最多產嘅球季（夾埋68球），又難怪朗尼講明今季至少入20粒畀大家睇嘅！家陣呢位英格蘭前鋒睇見新隊友迪比、舒尼達連先後開齋，邊到佢唔心急吖，今仗對住巴塞實行搏盡數胡都似。

最重要一點係，隨住皇馬已經定咗新季3名門將嘅波衫號碼，亦即意味住盛傳「登艦」嘅門神迪基亞將會留隊，「魔頭」尹戈爾賽前亦暗示呢單轉會新聞已經告一段落，將呢位西班牙門神喺雪櫃拎番出嚟，有迪基亞守住大門，「紅魔」鋒將當然可以放心進攻，為咗修補番同球迷及隊友嘅關係，迪基亞點都要交足功課零封對手先得。
柏度Hea踢等入「魔」

對家巴塞今仗讓晒車馬，西班牙《馬卡報》話，前鋒尼馬獲球會批准延至7月30日先返西班牙報到，王牌射手美斯直情抖到下個月先歸隊，冇咗呢兩大南美箭頭幫拖，單憑蘇亞雷斯好難惡得出樣啫。何況巴塞今季重組防線，右閘馬田蒙度亞被借去國米，左閘艾迪安奴亦可能轉投羅馬，削弱後防力量影響軍心，翼鋒柏度洛迪古斯又盛傳入「魔」在即，成班波貌合神離，點會有好表現先？