上齊架生同PSG駁火 車仔挽面子「大」過天

猪拉多纳

聽朝國冠盃有場重量級大戰，巴黎聖日耳門同車路士將會喺夏洛特駁火，「藍戰士」上仗「大蝦細」輸畀紐約紅牛「B隊」咁樣衰，當然希望做番齣好戲，撞正攻強守弱嘅PSG有望合演一場「大」龍鳳，捧1.7倍大啱數。（有線61及201、廣東體育周日早上6:05直播）
PSG一對中堅未歸隊

車路士喺國冠盃出師不利，首戰竟然輸畀派遣大部分小將出戰嘅紅牛2:4，搞到領隊莫連奴咩面都冇晒。聽朝對住PSG，相信「寸王」喺正選陣容上唔會太玩嘢，預計夏薩特、迪亞高哥斯達同法比加斯等主將悉數擔正，新加盟嘅「老虎」法卡奧亦會候命，實行同PSG鍊過。

PSG狀態大勇，兩場國冠盃先後砌低葡超盟主賓菲加同意甲嘅費倫天拿，伊巴謙莫域上陣有波入，18歲新星奧古斯天更加係兩仗勁入3球，火力夠晒癲。不過有樣嘢值得留意，就係PSG今屆兩場國冠盃場均失兩球，防中卡比耶離隊，一對中堅堤亞高施華、大衞雷斯又未歸隊，明顯令隊波防守力大為削弱，焗住以攻為守，今仗唔慌少波入啦！