米蘭打吡「大」鬧深圳

猪拉多纳

AC搏殺國米殘陣

國際冠軍盃喺深圳龍崗體育中心擺擂台，AC米蘭今晚對國際米蘭，扒逆水玩1.78倍入球大實際啲。雖然近年「米蘭打吡戰」悶到抽筋，但AC得到大水喉射住，傳聞泰國財團又注資1億歐元買人，新教練米赫洛域倒戈出戰，梗係要畀啲料老細睇啦！（有線61、64、201及203、廣東體育周六晚8:00直播）
AC熱身賽喪入波

趕扯恩沙基後，AC喺米赫洛域帶領下，頭2場熱身賽喪入10球。雖然AC上星期以1:2不敵里昂，但佢哋買咗阿祖安奴雷斯同卡路士巴卡後，仲話要簽番伊巴謙莫域返嚟，跟住作為新水喉嘅泰國財團，又掟多1億歐元擴軍，除非AC班前鋒想坐冷板，否則熱身賽一樣要搏命，更何況，米赫洛域倒戈都唔想衰啦！
國米維迪冇隨隊

另一方面，國米日前以0:1不敵拜仁慕尼黑，睇得出根本唔夠人用，特別係下半場換入副選同年輕球員後，根本得個走字。加上尼曼查維迪冇隨隊，新加盟嘅祖奧米蘭達傳聞因簽證問題缺陣，睇怕國米個後防都好難保持不失，就算近6次對賽全部開入球細，今場都可能被迫同AC鬥攻，整番場入球騷大家歎。