廣島強「細」食住水手

猪拉多纳

廣島三箭呢支前季日職冠軍，响改制後嘅今季日職首階段有啲脫腳，只係第3名衝線，如果次階段再唔發力，可能就無緣總決賽，難得佢哋近期的起心肝，表現愈戰愈勇，今日主場迎戰跌晒Watt嘅橫濱水手，有權小勝而回，1.73倍入球細抵博。（有線64及203周六晚6:00直播）
後防傷兵多有顧忌

講真，假如齋睇往績，入球細的確有啲風險，事關廣島歷史上主場19次出戰水手，只係開過6次細，比率得3成幾，而且廣島近8場走勢凌厲，開咗6大2細不特止，期間入咗24球，平均計就算對手唔入波，佢哋單靠自己都可以1場省3球，足夠搞個入球大出嚟。

但係打波嘅嘢一時一樣，水手雖然謝到近6戰不勝，不過佢哋由5月底起8場波開咗2大6細，即係話呢隊波疊埋心水守你嘅話，好少畀人打到爆晒。何況水手唔只有艾迪美臣巴拉加、齋藤學兩件射手，剛啱超越咗遠藤保仁、以18個罰球直接建功成為日職史上「FK王」嘅中村俊輔，都係攻擊性好強嘅球員，廣島冇法子唔放多啲精神响後面，以防畀呢三隻嘢攪亂檔。

事實廣島比較倚重佐藤壽人、淺野拓磨兩位前鋒搵食，水手唔會唔諗計凍結佢哋，況且柴崎晃誠拉傷左邊大髀要抖6個禮拜，鹽谷司又要休息多一個星期先出得，廣島只有用20歲新星野津田岳人打中場，呢件細路好係好，但係火候未足，喺呢場褪色嘅名門大戰，未必產生到作用，水手守得住唔奇，廣島想大炒唔係易事。