黑仔王伊拉奧拿投城追夢

猪拉多纳

當大家掛住睇韋拿、派路、林柏特、卡卡嘅時候，其實仲有一位名將值得留意，就係早前加盟紐約城嘅前西班牙國腳伊拉奧拿。呢位33歲右閘曾効力畢爾包14年，期間5次屈居盃賽亞軍，堪稱「地獄黑仔王」，伊拉奧拿毅然首次去海外搵食，希望打破「二奶命」，一嘗冠軍滋味。
五度踢決賽無緣冠軍

伊拉奧拿出身於畢爾包青年軍，絕大部分時間都係為呢支巴斯克地區球隊効力，屬於出名嘅忠臣。不過，佢今夏卻選擇離開母會，除咗因年紀大，難以應付西甲賽事外，更加想喺球員生涯晚年，贏番個冠軍。原來伊拉奧拿5次出戰盃賽決賽，都功虧一簣，包括12年歐霸盃，畢爾包吞馬體會3蛋，最近一次係今年5月西班牙盃決賽，1比3輸畀巴塞，伊拉奧拿已有3面西班牙盃銀牌，非常慘情。

伊拉奧拿認為紐約城雄心壯志，簽下韋拿、派路、林柏特，球隊實力屬於美職數一數二，有信心可以一圓冠軍夢。