里昂維拉利爾輪換大滙演

猪拉多纳

今晚酋長盃頭場有法甲里昂鬥西甲維拉利爾。里昂今季變動較少，而且比對手早開操狀態較佳，理論上勝算較高，但考慮到雙方連續兩日有比賽，教練難免會作出針對性輪換，今場建議捧大盤。

（TVB 301周日晚9時直播）

酋長盃四支參賽球隊要喺兩日內進行兩場比賽，如無意外會派出唔同球員應戰，由於執筆時仲未知道今場雙方首日排出乜嘢陣容，故此對勝負較難預測。里昂七月初已展開操練，同時下周便會跟巴黎聖日耳門角逐法冠盃，相信大部分球員已逐漸進入作戰狀態。前鋒拿卡錫迪及中場費基亞都係今夏轉會市場搶手貨，當中今次主辦單位阿仙奴更係頭號買家之一，一旦兩人有機會落場，相信會分外落力證明身價。里昂之前熱身賽對AC米蘭、燕豪芬及錫永都有失波，防線唔算太穩陣，今場失波機會亦高。
黃色潛艇試陣放膽攻

「黃色潛艇」維拉利爾今季陣容大變，前鋒韋圖、杜斯山度士、烏捷、中場摩西斯高美斯、後衞卓祖離隊，教練馬些連奴相信要花一定時間才可執正球隊，為求試陣勝負或比數反而唔重要，既然大家都冇乜心理包袱，今場捧大盤啱數。