紐約屠「城」上盤抵買

猪拉多纳

派路地標戰要省招牌

一代傳球大師派路正式登陸美職！呢位中場前日出席紐約城記招，並展示自己件21號新波衫，做好準備喺美國獻技。派路講明佢去美職唔係等退休，仲話好期待接受新挑戰，今晚紐約城主場對奧蘭多城，相信Fit爆射手韋拿等隊友實識做，實行以勝仗迎接派路，紐約城讓平半梗係撐1.84倍上盤啦！

（TVB301台周一凌晨2:30直播）

唔少球星離開歐洲搵食，通常有搵多筆等退休嘅心態，不過派路話明唔會Hea踢，佢同《米蘭體育報》講，話會繼續保持高水準踢好波，目的係要令意大利國家隊帶埋佢出戰出年舉行嘅歐國盃決賽周，無論鬥心同信心都爆晒棚。

雖然派路復操冇耐狀態未達巔峰，今戰未必會踢足全場，不過佢嘅傳送功夫同處理死球嘅技術，都肯定係世界頂級，有佢穿針引線，配合埋近5仗轟入6球嘅射手韋拿攻堅，紐約城入波瓣數肯定大增。
奧蘭多城近況勁曳

相反客軍奧蘭多城近況勁曳，唔計熱身賽已經連續4場贏唔到波，最近嗰3仗仲鋪鋪至少失2粒，防線堅信唔過。加上呢班波3日前喺美聯盃8強作客芝加哥火燄亦輸1:3，士氣受打擊仲要連體能都輸埋，今場作客紐約城怕且都冇運行。