皇馬BBC天河開Show

猪拉多纳

國米大變陣 隨時輸鑊甘！

國際冠軍盃上演重量級戲碼，國際米蘭喺廣州對皇家馬德里，唔似頂得住，畢竟國米前晚喺深圳同死對頭AC米蘭鍊完，未必回得切氣，何況皇馬嘅賓施馬已經重返正選陣容，「BBC」組合威力重現，唔講得笑，2.35倍「讓球客勝」抵玩！（有線61、64、201及203、廣東體育周一晚8:00直播）

今季國米陣容變動都幾大，最好笑係教練文仙尼似乎好想新加盟嘅中場干度比亞、後衞馬田蒙度亞同左閘謝臣梅里路盡快融入陣中，不斷咁催谷佢哋，早兩日鬥AC，已經見到呢班波係有質素，但就全無默契可言，不過文帥一於少理，賽前仲暗示會安排佢哋喺今場波一齊打正選！
一對中堅唔踢得

國米防線超殘

咁講真，中堅尼曼查維迪養傷冇隨隊，新簽嘅後衞祖奧米蘭達又話簽證有問題，國米防線嚴重不整，焗住用晒新兵同後備落場，但真係冇計，將就吓啦！

對家皇馬喺國冠盃首戰以互射12碼不敵羅馬後，日前以4:1炒起曼城極速反彈，當中嘅關鍵，當然係賓施馬打番正選啦，佢踢到21分鐘已經先開紀錄，賽後皇馬高層已保證唔會賣佢走，加上C朗同加里夫巴利都踢到65分鐘就被收起踢今鋪，相信皇馬唔會揸流攤，反而會繼續踩油，提前撻着「BBC」，迎接新球季。
皇馬征廣州

等於半個主場

仲有，「肥賓」賴完嘢之後唔敢再亂嚟，皇馬上場收起16歲挪威新星馬田奧迪加特，正正路路搵番莫迪歷同卻奧斯拍住正選，成條中場線當堂生番晒，鋒線王牌C朗得到皇馬高層呵番，話佢係隊中絕對重心，皮里茲日前又推咗PSG個10.2億天價收購方案，C朗明顯開心晒，連續兩場入波，對佢嚟講根本就冇難度啦！

最重要一點，係「銀河艦隊」今次中國行，令內地粉絲為之瘋狂，喺廣州掀起皇馬狂熱，能夠容納56,000人嘅天河體育場，今晚肯定座無虛席，當中絕大部分都係「艦躉」，就算哥倫比亞中場占士洛迪古斯唔落場，皇馬有半個主場之利，應該有足夠本錢玩殘國米。