後防立立亂華倫博大霧

猪拉多纳

德甲球隊科隆搞咗個「Colonia Cup」，搵到英超史篤城、西甲華倫西亞同葡超波圖嚟踢4角賽。華倫西亞同波圖會喺今晚交手，兩隊近期熱身賽後防踢嚟都麻麻，隨時出現入得又失得情況，阿謙今仗揀番個大盤。（TVB 302周六晚11時45分直播）

華倫西亞今夏大肆招兵，買咗切爾達前鋒辛迪文拿、賓菲加前鋒洛迪高摩連奴及中場安祖艾美達等新將，足足使咗近9,700萬歐元，不過使咗咁多錢並唔見有飛躍進步，踢咗4場熱身賽錄得2勝2負嘅成續，其中面對拜仁慕尼黑更慘負1比4，球隊後防表現立立亂，狀態明顯未操起。不過佢哋今夏搵咗幾位賓菲加球員加盟，今場呢班新兵面對舊東家死敵唔會手軟，應該大踢進攻足球。

波圖今夏亦多買賣，其中前鋒積臣馬天尼斯及哥利斯馬離隊影響最大，但相對補入華歷簡奴前鋒貝爾奴及皇馬門將卡斯拿斯等人。不過波圖近兩仗熱身賽亦係演出麻麻，贏唔到德甲嘅慕遜加柏同史浩克04，可見球隊始終需要時間磨合，面對同樣想贏波振士氣嘅華倫西亞隨時嚟個大手交易，一於捧入球大。